نامياري شاعره ۽ ليکڪا نائلا سپنا گل 40 سالن جي عمر ۾ وفات ڪري وئي جنهن بابت ڏکوئيندڙ خبرون اخبارن ۾ منهنجا سڄڻ ساٿي پڙھي چڪا ھوندا. مرحومه نامياري شاعر،مترجم ۽ اديب مرحوم قاضي مقصود گل جي ڌيءَ، چترڪار قاضي منظر حيات جي ڀائٽي ۽ شاعر ۽ ڪمپيئر ياسر قاضي جي وڏي ڀيڻ ھئي.
ھن سٻاجھيءَ شاعره جي خاندان بابت ۽ خود مرحومه بابت گل حيات اداري ۾ قاضي عبدالحي “قائل“ جي اولاد ۽ قاضي مقصود گل جي اولاد بابت چڱي خاصي ميڙي چونڊي اسان جي اداري ۾ موجود آھي.
مقصود گل پھريون شخص ھيو جيڪو بابا سائين ( ڊاڪٽر پٺاڻ) جي ياري ۾ آيو. ان جو بنيادي ڪارڻ اھو بابا جو ليک بڻيو جيڪو بابا سائين ڪراچي مان نڪرندڙ ھفتي وار “آزاد اخبار“ ۾ سندس والد مرحوم قاضي عبدالحي “قائل“ تي لکيو ھيو.
قاضي مقصود گل ھڪ مکڻ ماڻھو ھيو.جيترو شاعر ھيو اوترو وڏو ڀلو انسان ھيو.جڏھن بابا 1990 ۾ گل حيات ادارو ٺاھيو تہ مرحوم قاضي مقصود گل اڪثر اتي ايندو ھيو ۽ پنهنجي خاندان جي قلمي پورھيتن بابت پيو مواد جمع ڪرائيندو ھيو.مرحومه سپنا گل شاج لطيف يونيورسٽي مان ايم اي سنڌي ڪرڻ وقت جيڪو مونو گراف لکيو ھيو ان جي ڪاپي بہ مرحوم پاڻ اچي گل حيات اداري ۾ جمع ڪرائي ھئي . جيڪو سنڌ جو نقشو اسان جي اداري ۾ لڳل آھي اھو پڻ ھن ئي خاندان جي محبت ۽ رغبت جي نشاني آھي.
جڏھن ياسر قاضي پڙھندو ھيو تہ ھن پنهنجن ساٿين سان گڏجي نوابشاھہ يونيورسٽي ۾ سنڌي ادبي سنگت جي شاخ کولي ۽ اتان بابا سائين سان خط و ڪتابت ڪندو ھيو جيڪا سموري گل حيات ۾ موجود آھي.
قاضي عبدالحي قائل اتر سنڌ ۾ اھو مثال قائم ڪيو جو نہ فقط ھو پاڻ وڏو شاعر ھيو پر ھن جو اولاد ۽ اولاد جو اولاد شاعريءَ نثرنويسي ۾ مصوريءَ ۾ وڏو نالو ڪمايو ۽ وقت گذرڻ سان گڏ ھن خاندان ۾ شاعر توڙي مصور نہ فقط پيدا ٿيندا آيا آھن پر پنهنجي پنهنجي شعبي ۾ جھڙوڪ ڪارناما سر انجام ڏيندا آيا آھن. قاضي مقصود گل جي وفات کان پوءِ سندس نياڻي جي وفات نہ رڳو قاضي خاندان لاءِ پر گل حيات لاءِ پڻ وڏو نقصان سمجهئون ٿا. ڇو تہ قاضي عبدالحي قائل ان جي اولاد پوٽاڻ سنڌي ٻولي جي جيڪا جهولي ڀري آھي ۽ مصوري جي ميدان کي سرسبز رکيو آھي،اھڙو مثال اڃا ڪنهن ٻئي خاندان نہ ڏنو آھي ۽ ھن خاندان جي اهي قلم ڌڻي
گل حيات جا خيرخواه ۽ مددگار رهيا آھن ۽ هن نياڻئ جي وفات سان اسان جو هڪ خيرخواه گهٽجي ويو.
اداري ۾ قاضي خاندان جي اھڙي ھر ھڪ فرد بابت مواد موجود آھي جيڪڏھن مرحوم قاضي مقصود گل زنده ھجي ھا تہ اھڙي ميڙي چونڊي کي اپ ڊيٽ ڪرڻ ۾ وڏو سھڪار ڏئي ھا. اسان پنهنجي ڪوششن سان سنڌ جي ڪيترن ئي اديبن،شاعرن،ليکڪن ۽ شاعرن جي معلومات گڏ ڪئي آھي پر اھا آس اميد رکئون ٿا تہ مختلف شعبن سان لاڳاپيل شخصيتون اسان سان تعاون ڪن ۽ ٻيو نہ تہ گھٽ ۾ گھٽ پنهنجي زندگي بابت بنيادي معلومات گل حيات کي ڏياري موڪلن تہ جيئن اسان جي گڏ ٿيل مواد ۾ اضافا واڌارا ۽ سڌارا ايندا رھن.(ممتاز پٺاڻ)
