“مخدوم سعيدالزمان عاطف بابت گل حيات ۾ گڏ ڪيل مواد“
بابا جڏھن سنڌالاجي ۾ ڊپٽي ڊائريڪٽر ھيو تہ ھن اتي “ ڏات ڌڻين جي رٿا“ جي نالي سان ھڪ پراجيڪٽ ھلايو جنهن جو مقصد اھو ھيو تہ شاعرن،اديبن،صحافين ۽ سگھڙن وغيره جي زندگين جا احوال ۽ خدمتن بابت مواد ۽ معلومات گڏ ڪجي. اتي بابا سائين قومي اسيمبلي ۽ سنڌ اسيمبلي جي ميمبرن سان بہ رابطي ڪرڻ جي ڪوشش ڪئي تہ جيئن ھڪ ھڪ ميمبر جي پارليامينٽري ڪارڪردگيءَ ۽ حلقي جي عوامي خدمتن جو رڪارڊ ٺاھي سگھجي.
انهي زماني ۾ بابا سائين ھالا جي مخدومن جي ويجهو ھيوڇو تہ مخدوم سعيدالزمان وٽس اسلاميہ آرٽس ڪاليج ڪراچي ۾ پڙھيو ھيو ۽ مخدوم جميل الزمان وري سندس ھڪ بھترين دوست ھيو جنهن ڪري انهن ٻنهي مھربانن جي توسط سان مخدوم طالب المولا سان بہ بابا جي ويجهڙائپ ٿي.ان ڪري بابا ساڻن بہ اھڙيون ڳالھيون ڪندو ھيو .گل حيات ٺاھڻ ۾ مخدوم جميل الزمان بابا جي وڏي مدد ڪئي کيس گل حيات جي جڳھہ ٺھرائڻ لاءِ کيس “سرڪاري قرض وٺي ڏنو“.انهي زماني ۾ مخدوم جميل الزمان جو والد مخدوم محمد امين فھيم مرڪزي وزير ھيو جنهن ڪري گل حيات جي صدقي ڳوٺ خير محمد آريجا کي ٽيليفون سروس پڻ ملي سگھي. ان کان اڳ ڳوٺ ۽ ڀرپاسي ۾ اھا سھولت موجود نہ ھئي. پوءِ جڏھن گل حيات جڙيو تہ ٻئي مھربان گل حيات ۾ قرب جا قدم ڀري آيا هئا. بابا سائين گل حيات ۾ “مخدوم ڪارنر“ ٺاھيو.انهي ڪارنر ۾ اسان اڄ ڏينهن تائين مخدوم طالب المولا سندس اولاد ۽ پونئيرن جي علمي ادبي قلمي ۽ سياسي خدمتن بابت مواد ۽ معلومات گڏ ڪندا آھيون.
مخدوم سعيدالزمان عاطف سنڌ اسيمبلي جو ميمبر بہ ٿي رھيو ۽ پنهنجي سياسي خواه سماجي خدمتن بابت ٿيل خدمتن تي روشني وجھڻ وارو مواد گل حيات کي ڏياري موڪليندو ھيو . ھن صاحب اسيمبلي ميمبر جي حيثيت ۾ پنهنجي حلقي جي عوام جي حقن ۽ سهولتن لاءِ جيڪا بہ ڪوشش ڪئي ۽ جيڪا لک پڙھ ڪئي اھا گل حيات ۾ موجود آھي.اھا جيڪڏھن ڪتابي صورت ۾ ڇپرائجي تہ ھوند سنڌ يا قومي اسيمبلي جي نون ۽ گھٽ تجربو رکندڙ ميمبرن لاءِ گائيڊ بوڪ جو ڪم ڏئي.
ھالا جي مخدومن پنهنجي وڏي حضرت مخدوم نوح کان وٺي اڄ ڏينهن تائين سنڌ جي تصوف،سياست ۽ علم ادب ۾ وڏو اثر ۽ عمل دخل رکيو آھي.سندن اھڙين خدمتن کي محفوظ ڪرڻ ۽ انهن تي تحقيق ڪرڻ لاءِ ڪنهن يونيورسٽي ۾ چيئر قائم ٿيڻ گھرجي يا يونيورسٽين کان ٻاھر “ مخدوم نوح ريسرچ انسٽيٽيوٽ“ ٺھڻ گھرجي.
سعيدالزمان عاطف پنهنجي شخصيت ۽ حيثيت ۾ منفرد مقام رکي ٿو.ھن کي شاعري جي ڏات ورثي ۾ ملي.پاڻ مڃيل شاعرن مان ھڪ آھي ۽ سندس شاعري جي ھڪ ڪتاب جي مھورتي فنڪشن جي صدارت بابا ڪئي ھئي ۽ اھو فنڪشن ھالا ۾ ئي ٿيو ھو.(ممتاز پٺاڻ)
