نئين بمبئي ڪائونسل جو اجلاس بمبئي ۾ شروع ٿيو . سنڌ مان چونڊجي آيل چئن ميمبرن سيٺ هر چندراءِ وشنداس (ميونسپالٽين طرفان)،سيد ميان الهندو شاهه (لوڪلبورڊن طرفان) ، رئيس غلام محمد خان ڀرڳڙي (زميندارن ۽ جاگيردارن طرفان) ، مانٽيگو ويب (چيمبر آف ڪامرس طرفان) پڻ ان ۾ شرڪت ڪئي .

04 جنوري 1910ع

هوندراج ليلا رام ماڻڪ ”ڌايل“ لاڙڪاڻي ۾ ڄائو . 1947ع کان پوءِ لڏي وڃي آديپور ۾ آباد ٿيو . هن تحريڪ آزاديءَ ۾ پڻ حصو ورتو . سندس شمار مشهور شاعرن ، صحافين ۽ گائڪن ۾ ٿئي ٿو .

            هن جي لکيل ڪتابن مان ”ڪرشن ڀڄناولي“ (1923) ، ” آريا بچناولي“ (1946) ، ”سنگيت ڦول“ (1938) ، ”لاتيون ۽ جھونگار“ ۽ ” هوت هردي ۾ وڃايم“ ذڪر لائق آهن . هن هنديءَ ۾ پڻ ڪتاب لکيا آهن .

16 جنوري 1910ع

سنڌ مدرسي ۾ ”حسن علي آفندي هائوس“ واري عمارت ٺهي راس ٿي . ان جي پيڙهه جو پٿر جنوري 1909ع ۾ بمبئي جي گورنر ڪليرڪ رکيو هو . اڏاوت پهرين جنوري 1909ع کان شروع ٿي هئي . ۽ عيسى خان ان تي ٺيڪيداريءَ جو ڪم ڪيو .

15 فيبروري 1910ع

”اسلامڪ ڪلب“ ڪراچيءَ جي عهديدارن ۽ ميمبرن سنڌ جي ٽن اڳواڻن مير الله بخش ٽالپور ، رئيس غلام محمد ڀرڳڙي ۽ خانبهادر سيد الهندي شاهه جي مان ۾ رات جي ماني ۽ آجياڻي جو اهتمام ڪيو . هن گڏجاڻيءَ ۾ سنڌ مدرسي جي پرنسپال ٽي . ايڇ وائينس ، نور ڀائي جعفري ، شيخ واليجي ابراهيم جي ، محمد قادر ، سيٺ عبدالرحيم صالح محمد ، مير ايوب ، يوسف علي ڀائي ۽ ايس جي حاجي به شرڪت ڪئي .

07 آگسٽ 1910ع

هندستان ٿياسافيڪل سوسائٽيءَ جي برانچ انسپيڪٽر ، آسٽريليا جي رهواسڻ مس ڪي . برائونگ ڪراچيءَ پهتي . هن خالقڏني هال ۾ ڏهن ڏينهن ۾ اٺ ليڪچر ڏنا . اهي موضوع ٿياسافيءَ جي حوالي سان هئا ، ۽ انهن جا موضوع هئا ، انسان جو اندر ۽ ٻاهر ، ٿياسافي سمورن مذهبن جي سنگتياڻي ، ايندڙ تبديلي ، ڪرمه ، جذبن جو ملهه ۽ تربيت وغيره .

20 آگسٽ 1910ع

خالقڏنو هال ڪراچيءَ ۾ ٿياسافيءَ وارن عوامي گڏجاڻي سڏائي ، جنهن ۾ مائي ڪي برائونگ ”ٿياسافيڪل سوسائٽيءَ جي پايو وجھندڙ“ جي موضوع تي ليڪچر ڏنو . هن صاحبه وري 30 آگسٽ تي ٻيو ليڪچر به ڏنو ، جنهن جو عنوان هو ”انسان ذات جا قبيلا“

28 آگسٽ 1910ع

”هاري تحريڪ جي روح روان ۽ هارين جي حقن لاءِ مثالي قربانيون ڏيندڙ شخص حيدر بخش جتوئيءَ جي ولادت ٿي . هن پنهنجي علم ۽ قلم سان سنڌ جي خدمت ڪئي .

07 آڪٽوبر 1910ع