ڊاڪٽر در محمد پٺاڻ
(تو بن جاني! هيءَ جهان)
”ملڪي سياست ۾ سلطاني گواهن جو ڪلچر“
مصطفيٰ ڪمال جي سياسي قلابازي ملڪي سياست ۾ ڪو پهريون يا آخري واقعو ڪونهي، سلطاني گواهن جو اهو ڪلچر گهڻي وقت کان وٺي ملڪي سياست تي پڪي رنگ جيان اثرانداز ٿيڻ لڳو آهي. قدآور شخصيتون نوازشريف کي ڇڏي ويون، پيپلزپارٽيءَ کان پري ٿي ويون ۽ ايم ڪيو ايم کان الڳ ٿي رهيون آهن. اهڙين تبديلين جا ڪي ته ڪارڻ آهن، ڪا ته پلاننگ آهي ۽ ڪنهن مخفي ڌر جا ان ۾ مفاد ٿي سگهن ٿا. ڪنهن سبب کان سواءِ نالي وارا سياستدان ڪک پن جيان چري نه ٿا سگهن. ڪو سندن اندر جو يا ٻاهر جو طوفان آهي، جنهن جي تيز هوا کين ائين چوري پوري ٿي.
ايم ڪيو ايم ڪنهن جوڙي؟ ڪيئن جڙي؟ ۽ هن پارٽيءَ جي اڳواڻن غربت کان محلاتن طرف ڪيئن هجرت ڪئي؟ توٻرن ۾ بند لاشن ۽ لاشن جي سياست جي انهن ابتدا ڪئي يا ٻين ڪئي؟ انهن اهم ۽ گنڀير سوالن جا جواب هر ڪنهن دل ۽ دماغ ۾ موجود آهن.
ايم ڪيو ايم جي ماضي قريب جي سياست، الطاف ۽ سندس ويجهن ساٿين تي ڪيسن جا ڪڙا، سگهارين ڌرين طرفان نائن زيرو تي ڇاپو، صولت مرزا طرفان رازن تان پردو کڻڻ، الطاف جو ملڪي آرميءَ تي ڪاوڙجڻ ۽ ڪاوڙجي معافي وٺڻ، سنڌ کي ورهائڻ جا مطالبا اهڙا واقعا آهن، جن مان ايم ڪيو ايم جي ماضي، حال مستقبل جو عڪس چٽي سگهجي ٿو.
ايم ڪيو ايم تي لڳي ٿو اهو ئي نسخو استعمال ٿيڻ شروع ٿيو آهي، جيڪو سنڌ جي قومپرست سياسي قوت تي ڪم آندو ويو. جيئن سنڌ جي قومپرست قوت پنجن مان پندرهن ٿيڻ لڳي آهي ۽ ان ۾ پنهنجن يا پراون تقسيم در تقسيم جو ٻج ڇٽيو. ائين هاڻي ايم ڪيو ايم به ساڳيءَ ريت ورهائجڻ ۽ تقسيم ٿيڻ واري مرحلي مان گذاري ويندي.
جيئن چوندا آهن ته ”لڳي ڀاڳ ته وڌي واڙي“، انهيءَ مصداق جيڪڏهن ڪنهن پارٽيءَ جو ڀلي ڀاڳ نه هجي، پر اها عوام جي مفاد ۾ آهي ته عوام دشمن قوتن ۾ ٽوٽ ۽ ڦوٽ اچي.
ايم ڪيو ايم ۾ ڦوٽ پئي ٿي ته ان مان سنڌ جي سياست تي به اثر پوندا. اردو ڳالهائيندڙ سنڌ دوست ماڻهن کي موقعو ملي سگهي ٿو ته اهي ڪنهن آمرانه انداز تي هلندڙ پارٽيءَ جو ڳٽ ڳچيءَ مان لاهي، پنهنجي انهن سنڌي ڀائرن جي ويجهو وڃن، جن جي وڏڙن سندن وڏڙن کي انهيءَ وقت جيءَ ۾ جايون ڏنيون، جيڪي ورهاڱي کانپوءِ بي گهر ٿي سنڌ ۽ سنڌيءَ جي در تي پهتا. مهاجرن جو اهو مجبور طبقو آزاديءَ سان سنڌ ۽ ملڪي سياست ۾ پنهنجو مثبت ڪردار ادا ڪرڻ جي لائق ٿي ويندو. ان مان سنڌ جي اهڙن ماڻهن کي سنڌ دوست اردو ڳالهائيندڙن جي ويجهي وڃڻ جو موقعو ملندو، جن جي ذهنن ۽ زبانن تي ڪن ٻين اثرن جا بار رکيا ويا آهن.
مصطفيٰ ڪمال پنهنجي محسنن کان ناراض ٿيو آهي، ان جا کوڙ سارا اندروني ۽ بيروني، داخلي ۽ خارجي سبب هوندا. هو ايم ڪيو ايم کان الڳ ٿي ڀلي وڃي پنهنجي پارٽي ٺاهي. پر ڪن ڳالهين تي سوچڻ، ناراض ٿيڻ ۽ نئين راءِ قائم ڪرڻ جو حق ۽ موقعو اسان کي به ملڻ گهرجي. مصطفيٰ ڪمال ايم ڪيو ايم ۽ ان جي باني اڳواڻ لاءِ وڏيون ڳالهيون ڪيون آهن ۽ انهن جي غلط ڪارين ۾ ملوث ماڻهن جي پڻ نشاندهي ڪئي آهي.
اهي ڳالهيون اسان کان وسرڻ نه گهرجن. اسان کي اهو به سمجهڻ گهرجي ته ٻليون ست ڪئا کائي حج تي ڇو وينديون آهن ۽ اسان انهن کي حاجاڻيون ڇو ڪري مڃيندا آهيون. مصطفيٰ ڪمال جي چواڻي ايم ڪيو ايم ۽ ان جي بانيءَ سالن جا سال قومي گناهه ڪيا ۽ غداري جو مرتڪب ٿيا. انهيءَ ڪم ۽ عمل ۾ ان وقت تائين مصطفيٰ ڪمال به شامل رهيو، جيستائين انهن کان الڳ نه ٿيو. ڇا اسان جا حڪمران، ۽ اسان جا ضمير ان تي ڪو پاڻمرادو نوٽيس وٺي نه ٿا سگهن؟ هي ڪٿان جو انصاف آهي ته سلطاني گواهه جو داغدار ماضي اک ڇنڀ ۾ پاڪ ۽ صاف بڻجي ۽ وڃي ۽ وڏين شاهدين ثابتين ملڻ کانپوءِ به انسان دشمن ۽ قومي غدارن جو وار به ونگو نه ٿئي.
Email: This email address is being protected from spambots. You need JavaScript enabled to view it.
Website: www.drpathan.com
