سنڌ جي ڪمشنر مسٽر آر گلس جي صدارت هيٺ فريئر هال ۾ گڏجاڻي ٿي ته جيئن مهاراڻي وڪٽوريا جو مجسمو ٺهرائي فريئر هال ۾ مناصب هنڌ تي نصب ڪجي . طئي ڪيو ويو ته گھٽ ۾ گھٽ چندو پنجاهه روپيه هجڻ گھرجي .  خيرپور جي مير هزهائينس فيض محمد خان پنجويهه روپيا چندو ڏنو .

13 اپريل 1901ع

مولوي غلام الرسول ولد علي بخش تنيو ڳوٺ بکر تنئي ۾ ڄائو . هن بزرگ ڪيترن ڳوٺن ۾ مسجدون ٺهرايون ۽ مدرسا قائم ڪيا . مرحوم دين جو عملي مبلغ هو .

23 جون 1901ع

بمبئي سرڪار پنهنجن ٻن حڪم نامن هر هڪ نمبر 4942 ( بامبي روينيو ڪوڊ 1870 جي سيڪشن 7 تحت ) ۽ 4942.1 ( انڊين رجسٽريشن ايڪٽ 3 آف 1877 جي سيڪشن 5 تحت ) ذريعي پهرين آگسٽ 1901ع کان ”لاڙڪاڻو ضلعو“ قائم ڪيو ۽ ان لاءِ شڪارپور خواه ڪراچي ضلعن مان هي تعلقا ڪڍي لاڙڪاڻي ضلعي کي ڏنا ويا .

           ضلعي شڪارپور جا تعلقا ، لاڙڪاڻو ، قمبر ، رتوديرو ، لب مهرڻ (ڏوڪري) ، ڪڪڙ ، ميهڙ ۽ نصيرآباد .

          ضلعي ڪراچيءَ جا تعلقا ، جوهي ، دادو ۽ سيوهڻ .

هي حڪم ناما بمبئي سرڪار جي چيف سيڪريٽري جي . ڊبليو . پي ميوئر مڪنزئي جي دستخط سان جاري ٿيا . 

16 جولاءِ 1901ع